ଅଲ୍ ଇଣ୍ଡିଆ ଅର୍ଗାନାଇଜେସନ୍ ଅଫ୍ କେମିଷ୍ଟସ୍ ଆଣ୍ଡ ଡ୍ରଗିଷ୍ଟସ୍ (AIOCD) ଙ୍କ ଆହ୍ୱାନରେ ଆଜି ରାଜ୍ୟବ୍ୟାପୀ ମେଡ଼ିସିନ ଦୋକାନ ବନ୍ଦ ରହିଥିବାରୁ ସାଧାରଣ ଲୋକ ଚରମ ଅସୁବିଧାର ସମ୍ମୁଖୀନ ହୋଇଛନ୍ତି । ସକାଳୁ ସକାଳୁ ଔଷଧ କିଣିବା ପାଇଁ ଆସିଥିବା ରୋଗୀ ଓ ସେମାନଙ୍କ ପରିବାର ଲୋକେ ବନ୍ଦ ଦୋକାନ ଦେଖି ହତାଶ ହୋଇଥିଲେ । ବିଶେଷକରି ଦୈନିକ ଔଷଧ ଖାଉଥିବା ବୃଦ୍ଧ ରୋଗୀ, ଡାଏବେଟିଜ୍, ବ୍ଲଡ୍ ପ୍ରେସର ଓ ଅନ୍ୟାନ୍ୟ ଗୁରୁତର ରୋଗୀମାନେ ବହୁତ ହଇରାଣ ହୋଇଥିବା ଦେଖାଯାଇଛି । ମେଡ଼ିସିନ ଦୋକାନ ବନ୍ଦ ଥିବାରୁ ଲୋକମାନେ ସରକାରୀ ମେଡିକାଲ ଭିତରେ ଥିବା “ନିରାମୟୀ” ଔଷଧ ବିତରଣ କେନ୍ଦ୍ରକୁ ଧାଉଥିଲେ । ଫଳରେ ସେଠାରେ ଭୟଙ୍କର ଭିଡ଼ ଦେଖିବାକୁ ମିଳିଥିଲା । ଲୋକମାନେ ଦୀର୍ଘ ସମୟ ଧରି ଧାଡିରେ ଛିଡ଼ା ହୋଇ ଔଷଧ ନେବା ପାଇଁ ଅପେକ୍ଷା କରୁଥିଲେ । କେତେକ ସ୍ଥାନରେ ଧକ୍କାମୁକ୍କି ପରିସ୍ଥିତି ମଧ୍ୟ ସୃଷ୍ଟି ହୋଇଥିବା ସୂଚନା ମିଳିଛି । ଦୂରଦୂରାନ୍ତରୁ ଆସିଥିବା ରୋଗୀମାନେ ଗୋଟିଏ ଔଷଧ ପାଇଁ ବିଭିନ୍ନ ସ୍ଥାନ ଘୁରିବାକୁ ପଡ଼ିଥିଲା । ଛୋଟ ଶିଶୁ ଓ ବୃଦ୍ଧଙ୍କୁ ନେଇ ଆସିଥିବା ପରିବାର ଲୋକେ ମଧ୍ୟ ବହୁତ ଅସୁବିଧା ଭୋଗିଥିଲେ । ଅନେକ ରୋଗୀ ଅଭିଯୋଗ କରିଥିଲେ ଯେ, ଜରୁରୀ ସମୟରେ ଔଷଧ ନମିଳିବା ତାଙ୍କ ପାଇଁ ବଡ଼ ସମସ୍ୟା ସୃଷ୍ଟି କରିଛି । ଔଷଧ ବ୍ୟବସାୟୀ ସଂଘ ପକ୍ଷରୁ ଇ-ଫାର୍ମାସି ଓ ଅନଲାଇନ୍ ଔଷଧ ବିକ୍ରି ବିରୋଧରେ ଏହି ବନ୍ଦ ଡାକରା ଦିଆଯାଇଥିବା ବେଳେ, ଏହାର ସିଧାସଳଖ ପ୍ରଭାବ ସାଧାରଣ ରୋଗୀଙ୍କ ଉପରେ ପଡ଼ିଥିବା ଦେଖିବାକୁ ମିଳିଛି ।
