ବାଲେଶ୍ୱରସ୍ଥିତ ଫକୀର ମୋହନ ବିଶ୍ୱବିଦ୍ୟାଳୟ ପକ୍ଷରୁ ୭ମ ସେମିଷ୍ଟାର ବିଏସସି ନର୍ସିଂ (B.Sc. Nursing) ପରୀକ୍ଷା ତାରିଖ ଘୋଷଣା କରାଯାଇଛି। ନର୍ସିଂ ଛାତ୍ରଛାତ୍ରୀଙ୍କ ଦୀର୍ଘ ଦିନର ଧାରଣା ଓ ଦାବି ପରେ ବିଶ୍ୱବିଦ୍ୟାଳୟର ପରୀକ୍ଷା ନିୟନ୍ତ୍ରକଙ୍କ କାର୍ଯ୍ୟାଳୟ ପକ୍ଷରୁ ୨୦୨୧-୨୨ ଏବଂ ୨୦୨୨-୨୩ ବ୍ୟାଚ୍ର ନିୟମିତ ପରୀକ୍ଷା ପାଇଁ ବିଜ୍ଞପ୍ତି ପ୍ରକାଶ ପାଇଛି।
ସୂଚନାଯୋଗ୍ୟ ଯେ, ୪ ବର୍ଷର ନର୍ସିଂ ପାଠ୍ୟକ୍ରମ ୬ ବର୍ଷରୁ ଅଧିକ ସମୟ ଧରି ଚାଲିଥିଲେ ସୁଦ୍ଧା ସପ୍ତମ ଏବଂ ଅଷ୍ଟମ ସେମିଷ୍ଟାର ପରୀକ୍ଷା ବାକି ପଡ଼ିଥିଲା । ଏହାକୁ ନେଇ ଛାତ୍ରଛାତ୍ରୀମାନେ ଘୋର ଅସନ୍ତୋଷ ବ୍ୟକ୍ତ କରିବା ସହ ବିଶ୍ୱବିଦ୍ୟାଳୟ କ୍ୟାମ୍ପସ ବାହାରେ ଧାରଣା ଦେଇଥିଲେ। ତେବେ ବର୍ତ୍ତମାନ ପରୀକ୍ଷା ତାରିଖ ଘୋଷଣା ହେବା ପରେ ଶହ ଶହ ନର୍ସିଂ ଛାତ୍ରଛାତ୍ରୀଙ୍କ ମଧ୍ୟରେ ଆଶ୍ୱସ୍ତି ଦେଖାଦେଇଛି।
ନୂତନ ବିଜ୍ଞପ୍ତି ଅନୁଯାୟୀ, ଥିଓରୀ ପରୀକ୍ଷା ଆସନ୍ତା ଜୁଲାଇ ୧୪ ଏବଂ ଜୁଲାଇ ୧୫, ୨୦୨୬ ରେ ଅନୁଷ୍ଠିତ ହେବ । ସେହିପରି ପ୍ରାକ୍ଟିକାଲ୍ ପରୀକ୍ଷା ଜୁଲାଇ ୧୭ ଏବଂ ୧୮, ୨୦୨୬ ରେ କରାଯିବ। ଥିଓରୀ ବିଷୟଗୁଡ଼ିକରେ କମ୍ୟୁନିଟି ହେଲ୍ଥ ନର୍ସିଂ ଏବଂ ମିଡୱାଇଫେରୀ ବା ଅବଷ୍ଟେଟ୍ରିକ୍ସ ଆଣ୍ଡ ଗାଇନେକୋଲୋଜି (OBG) ନର୍ସିଂ ସାମିଲ ରହିଛି। ସମସ୍ତ ଥିଓରୀ ପରୀକ୍ଷା ଅପରାହ୍ନ ୨ଟା ରୁ ୫ଟା ପର୍ଯ୍ୟନ୍ତ ନିର୍ଦ୍ଧାରିତ କେନ୍ଦ୍ରଗୁଡ଼ିକରେ ଅନୁଷ୍ଠିତ ହେବ।
