ବାଲିଗୁଡା ବି ବାଦ ପଡ଼ିନାହିଁ ଏଥିରେ
ଅନଲାଇନରେ ବେଆଇନ ଔଷଧ ବିକ୍ରୟ ଏବଂ କର୍ପୋରେଟ୍ ସଂସ୍ଥାଗୁଡ଼ିକର ମନମୁଖୀ ରିହାତି ପ୍ରଥା ବିରୋଧରେ ଆଜି ସାରା ଦେଶ ସମେତ ଓଡ଼ିଶାରେ ମଧ୍ୟ ଔଷଧ ଦୋକାନଗୁଡ଼ିକ ସମ୍ପୂର୍ଣ୍ଣ ବନ୍ଦ ରହିଥିବା ବେଳେ ଏଥିରେ ବାଲିଗୁଡା ଉପଖଣ୍ଡ ସମେତ ତୁମୁଡିବନ୍ଧ କୋଟଗଡ଼ ବି ବାଦ ପଡ଼ିନାହିଁ । ‘ଅଲ୍ ଇଣ୍ଡିଆ ଅର୍ଗାନାଇଜେସନ୍ ଅଫ୍ କେମିଷ୍ଟସ୍ ଆଣ୍ଡ ଡ୍ରଗିଷ୍ଟସ୍’ (AIOCD) ର ଆହ୍ୱାନ କ୍ରମେ ‘ଉତ୍କଳ କେମିଷ୍ଟସ୍ ଆଣ୍ଡ ଡ୍ରଗିଷ୍ଟସ୍ ଆସୋସିଏସନ’ (UCDA) ପକ୍ଷରୁ ଏହି ୨୪ ଘଣ୍ଟିଆ ବନ୍ଦ ଡାକରା ଦିଆଯାଇଛି। ଗତକାଲି (ମଙ୍ଗଳବାର) ମଧ୍ୟରାତ୍ରରୁ ଆରମ୍ଭ ହୋଇଥିବା ଏହି ବନ୍ଦ ଆଜି ମଧ୍ୟରାତ୍ର ପର୍ଯ୍ୟନ୍ତ ଜାରି ରହିବ।
ରାଜ୍ୟର ପ୍ରାୟ ୩୦,୦୦୦ ରୁ ଅଧିକ ଖୁଚୁରା ଓ ଜେନେରାଲ୍ ଔଷଧ ଦୋକାନ ଏହି ଆନ୍ଦୋଳନରେ ସାମିଲ ହୋଇଛନ୍ତି। ସଙ୍ଘର ଅଭିଯୋଗ ଅନୁଯାୟୀ, ଇ-ଫାର୍ମାସୀ ଏବଂ ଡିଜିଟାଲ୍ ପ୍ଲାଟଫର୍ମଗୁଡ଼ିକ କୋଭିଡ୍ ସମୟର ସ୍ୱଳ୍ପକାଳୀନ ନିୟମର ସୁଯୋଗ ନେଇ ବିନା କୌଣସି କଡ଼ା ଯାଞ୍ଚରେ ଔଷଧ ବିକ୍ରି କରୁଛନ୍ତି। ଏହାଦ୍ୱାରା ପାରମ୍ପରିକ ଔଷଧ ବ୍ୟବସାୟୀ ଓ ସେମାନଙ୍କ ଉପରେ ନିର୍ଭର କରୁଥିବା ଲକ୍ଷ ଲକ୍ଷ ପରିବାରର ଜୀବିକା ବିପନ୍ନ ହେବା ସହ ନକଲି ପ୍ରେସକ୍ରିପସନ୍ ଏବଂ ଆଣ୍ଟିବାୟୋଟିକର ଅପବ୍ୟବହାର ବଢ଼ିବାର ଆଶଙ୍କା ଦେଖାଦେଇଛି।
“ଔଷଧ କେବଳ କୌଣସି ସାଧାରଣ ଡେଲିଭରି ସାମଗ୍ରୀ ନୁହେଁ, ଏହା ସ୍ୱାସ୍ଥ୍ୟ ସହ ଜଡ଼ିତ ଏକ ଗୁରୁତ୍ୱପୂର୍ଣ୍ଣ ବିଷୟ। ଅନଲାଇନ୍ କମ୍ପାନୀଗୁଡ଼ିକର ଅସାଧୁ ପ୍ରତିଯୋଗିତା ଯୋଗୁଁ ଗ୍ରାମାଞ୍ଚଳ ଓ ସହରାଞ୍ଚଳର ଛୋଟ ଛୋଟ ଦୋକାନୀମାନେ ବନ୍ଦ ହେବା ସ୍ଥିତିକୁ ଚାଲିଆସିଲେଣି।
